அரசு பள்ளிகளில் பயிலும் மாணவர்களின் தலைமைப் பண்பை வளர்க்கு விதமாக ரூ.2 கோடி செலவில் ”மகிழ் முற்றம்” என்ற திட்டத்தை பள்ளிக் கல்வித்துறை தொடங்கியுள்ளது. இதன் மூலம் பள்ளிகளில் மாதிரி சட்டப்பேரவை, மாதிரி நாடாளுமன்றம் உருவாக்கப்படவுள்ளது.
இதன் மூலம் மாணவர்களிடம் அரசியல் அறிவு சார்ந்த அனுபவங்கள் மற்றும் ஆளுமைத் திறன் மேம்படுத்தப்படவுள்ளது.
மகிழ் முற்றம் திட்டத்தின் மூலம் குறிஞ்சி, முல்லை, மருதம், நெயதல், பாலை எனும் பெயர்களில் மாணவர்கள் குழுக்கள் அமைத்து அதில் ஒரு மாணவர் தலைவர் மற்றும் மாணவ அமைச்சர்கள் தேர்வு செய்யப்படுவார்கள்.
குழுவாக இணைந்து செயல்படுதல், பரஸ்பர ஆதரவு, வேற்றுமை இல்லாத உறவு, சமூக மனப்பான்மை, தலைமை பண்பு, அரசியல் இயக்கம் ஆகியவை மாணவர்களிடம் உருவாக்குவதே இந்த திட்டத்தின் நோக்கமாகும்.
அரசு பள்ளிகளில் 1 முதல் 12-ம் வகுப்பு வரை உள்ள மாணவர்கள் குழுக்களாக பிரிக்கப்படுவர். இதற்கான பயிற்சிகள் தலைமை ஆசிரியர்கள் மற்றும் ஆசிரியர்களுக்கு வழங்கப்படும் என தெரிவிக்கப்பட்டுள்ளது. ரூ.2 கோடி இத்திட்டத்தை செயல்படுத்த ஒதுக்கப்பட்டுள்ளது.
மகிழ் முற்றம் திட்டச் செயலாக்கத்துக்கென கையேடு பள்ளிக் கல்வித் துறையால் வடிவமைக்கப்பட்டுள்ளது. இதில் வழங்கப்பட்டுள்ள வழிமுறைகளைப் பின்பற்றி 37,592 அரசுப் பள்ளிகளில் குழுக்கள் அமைக்கப்படும்.
